काठमाडौं- पत्रकार शालिकराम पुडासैनीको आत्महत्या प्रकरणमा आरोपीहरुमध्ये टेलिभिजन कार्यक्रम प्रस्तोता रवि लामिछाने र पत्रकार युवराज कँडेलको बयान लिने कार्य सकिएको छ।
नेपाल प्रहरीले जिल्ला सरकारी वकिलको कार्यालयमा आइतबार अभियोगपत्र दायर गरेको थियो। सो अभियोगपत्रको अध्ययनपछि जिल्ला सरकारी वकिलको कार्यालय चितवनले मुलुकी फौजदारी संहिताको दफा १८५ अनुसार आत्महत्या गर्न दुरुत्साहन गरेको भन्दै लामिछाने, कँडेल र 'रुकु' भनिने अस्मिता कार्कीलाई विपक्षी बनाउँदै आत्महत्या दुरुत्साहनको मुद्दा जिल्ला अदालत चितवनमा दायर गरेको थियो।
मुद्दा दायर गरिएसँगै आरोपीहरुमाथि अदालतमा बयान लिन सुरु गरिएको थियो। आइतबार न्यायाधीश हेमन्त रावलको इजलासमा कार्कीको बयान लिइएको थियो। समय अभाव भएपछि आइतबार लामिछाने र कँडेलको बयान लिन बाँकी थियो। आज दुवैलाई जिल्ला अदालतमा उपस्थित गराई न्यायाधीश रावलको इजलासमा बयान लिइएको हो।
कार्कीले बयानमा पुडासैनीसँग आफू साथीको रुपमा रहे पनि आत्महत्या गर्ने कार्यमा भने उक्साहट नगरेको दाबी गरेकी छन्। उनले उक्त अभियोगबाट आफूले सफाइ पाउनुपर्ने माग गरेकी छन्।
आरोपी तीनै जनाको बयान सकिएपछि अब थुनछेक बहस सुरु हुनेछ। सरकारी र आरोपी पक्षका कानुन व्यवासायीको दुईतर्फी बहसपछि अदालतले आदेश गर्नेछ। अदालतको आदेशले उनीहरुलाई थुनामा पठाउने कि हिरासतमा राख्ने भन्नेबारे निर्णय गर्नेछ।
आरोप पत्रमा उनीहरुलाई हदैसम्मको अर्थात् पाँच वर्ष कैद र ५० हजार रुपैयाँ जरिवाना हुनुपर्ने माग गरिएको छ।
यसैबीच जिल्ला प्रशासन कार्यालयले आइतबार राति एक सूचना जारी गर्दै तोकेको निषेधित क्षेत्र उल्लंघन गरिएको छ। लामिछानेका समर्थकहरुले भरतपुरका केही स्थानमा निषेधित क्षेत्र तोड्ने कार्य गरेपछि प्रहरीले बल प्रयोग गरेको छ। समर्थकहरुले नारायणगढबाट मोटरसाइकल र्यालीसमेत निकालेका छन्।
भरतपुर क्षेत्रमा ठूलो संख्यामा प्रहरी परिचालन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778207517.png)
-1764146706.png)
