एनसिसीका पूर्वअध्यक्ष शाहविरुद्ध कोरियाको अदालतमा मुद्दा दायर

किन मुद्दा हाले राजेन्द्र मल्लले?
शिव भुसाल | २०७६ भदौ १९ बिहीबार | Thursday, September 05, 2019 १९:३३:०० मा प्रकाशित

सोल (कोरिया)- रकम तिर्न अटेरी गरेको भन्दै एक नेपालीले नेपालीविरुद्ध नै कोरियाको अदालतमा मुद्दा दर्ता गरेका छन्। नेपाली सम्पर्क समिति (एनसिसी) दक्षिण कोरियाका पूर्व अध्यक्ष प्रेम शाहले ४ वर्षअघि लिएको रकम तिर्न अटेर गरेको भन्दै बाजुराका राजेन्द्र मल्लले इलसान अदालतमा मुद्दा दर्ता गरेका हुन्।

व्यावसायिक साझेदार बनाउन भन्दै शाहले पटकपटक गरी आफूसँग १३ लाख ५० हजार नेपाली रुपैयाँ लिएको मल्लले बताएका छन्। अदालतमा मुद्दा दर्ता गर्नुअघि उनले प्रहरीमा उजुरी गरेका थिए। प्रहरीको बयानमा शाहले सबै रकम तिरिसकेको झुटो बयान दिएका थिए। शाहले आफूले नै हवाई टिकट काटेर मल्ललाई नेपाल पठाएको बयान दिए पनि त्यो झुटो साबित भएको थियो। मल्लले आफैले टिकट काटेर नेपाल फर्किएको भन्दै प्रहरीलाई हवाई टिकट नै बुझाएका थिए। 

प्रहरीले शाहलाई पोलिग्राफ टेस्ट गर्ने तयारी गरे पनि उनले अस्विकार गरेका थिए। उक्त उजुरीका विषयमा प्रहरीले थप अनुसन्धान गरिरहेको बताएको छ। 

अदालतमा शाह विरुद्धमा दुई मुद्दा दर्ता भएका छन्। पहिलो– व्यवसायमा साझेदार बनाउँछु भन्दै लिएको रकम फिर्ता नगरेको। दोस्रो– कोरियन महिलासँग अदालती विवाह (कोर्ट म्यारिज) गराइदिन्छु भन्दै मल्लबाटै रकम लिएर ठगेको। 

शाहले आफ्नो होटल व्यवसायमा साझेदार बनाएर आम्दानी बराबर गर्ने सहमतिमा रकम लिएको मल्लको दाबी छ। त्यसबेला मल्ल इपिएस कामदार थिए। 'मेरो भिसा सकिएपछि बिजनेस भिसामा परिणत गराई सँगै व्यवसाय गर्ने भनी शाहले उक्त रकम लिएका हुन्,' उनले भने। तर पछि शाहले भिसा परिवर्तन गर्न नसकिने जवाफ दिएका थिए। 

कोर्ट म्यारिजका लागि मल्लले पठाएको २ लाखको रसिद

पाँचवर्षे इपिएस भिसा सकिएर नेपाल फर्किएका मल्लले आफूसँग लिएको रकम फिर्ता गर्न निरन्तर ताकेता गरे पनि फिर्ता नपाएको सुनाए। पैसा फिर्ता गर्नुको साटो शाहले एक कोरियाली महिलासँग कोर्ट म्यारिज गराइदिने भन्दै प्रपञ्च रच्न थाले। शाहले कोरियन महिलाको तस्बिर समेत पठाएर स्विकृति मागेका थिए। उक्त कुरा प्रहरीलाई मल्लले बुझाएको दुवै जनाको फेसबुक वार्तालापबाट खुलेको छ। 

मल्ल कोरियाली महिलासँग कोर्ट म्यारिज गर्न राजी भएपछि शाहलाई २ लाख रुपैयाँ पठाइदिए। त्यसपछि भने शाह नै सम्पर्कविहीन भएको उनी बताउँछन्।

मल्लले निरन्तर आफ्नो पैसाको ताकेता गरेपछि शाहले समयावधि दिँदै झुलाउँदै आएका थिए। ‘हप्तामा तिर्छु। एक महिनामा तिर्छु भन्दै टारे। तर दिएनन्,’ मल्लले नेपाल लाइभसँग भने। 

मल्लले विदेशमा नेपालीबाट ठगिएकाहरुको विषयमा प्रहरीको केन्द्रीय अनुसन्धान ब्युरो (सिआइबी) मा पनि परामर्श लिएका थिए। सिआइबीले कोरियाबाटै न्याय खोज्न सुझाव दिएपछि मल्ल पर्यटक भिसामा कोरिया फर्किए।

उक्त समस्याका विषयमा २ वर्षअघि अर्जुनजंग बहादुर सिंह राजदूत रहँदा सोलस्थित नेपाली दूतावासमा लिखित निवेदन दिए पनि दूतावासले कुनै सुनुवाइ नगरेको मल्लको गुनासो छ।

उक्त मुद्दामा अदालतले शाहले रकम नतिरेको तथा झुटो बोलेको ठहर भएमा तिर्नुपर्ने सम्पूर्ण रकमसहित जरिवाना गरी नेपाल डिपोर्ट गर्ने कानुनी व्यवस्था रहेको मल्लको पक्षमा बहस गरिरहेका वकिलले बताए। 

मल्लले कानुनी उपचारका क्रममा खर्च भएको सम्पूर्ण रकम सहित २० लाख नेपाली रुपैयाँ बराबरको क्षतिपूर्ति पाउनुपर्ने माग गरेका छन्।

व्यावसायिक साझेदारीका लागि भन्दै गरिएको कागज

पुर्ख्यौली घर बाजुरा भएका शाहका परिवार कैलाली बसाइँ सरेको थियो। इपिएसमार्फत कोरिया गएका उनले भिसा परिवर्तन गरी बिजनेस भिसा गरेका थिए। एनसिसीका एक पूर्व पदाधिकारीले शाह हुन्डी कारोबारमा समेत संम्लग्न रहेको आरोप लगाए। फाजुस्थित कुम्छनमा अन्नपूर्ण रेस्टुरेन्ट सञ्चालनमा ल्याएका उनी हाल उक्त रेस्टुरेन्ट बिक्री गरी मार्ट सञ्चालनको तयारीमा छन्। 

एनसिसी अध्यक्ष हुँदा १ करोड २२ लाख वन हिनामिना
एनसिसी कोरियाका निवर्तमान अध्यक्ष समेत रहेका शाहले मुख्य नेतृत्वमा रहँदा संस्थाको १ करोड २२ लाख वन अनियमितता गरेको एनसिसी कोरियाले जनाएको थियो। 

गत वर्ष अगस्ट २१ मा संस्थाको अध्यक्ष अञ्जु केसीले जारी गरेको विज्ञप्तिमा संस्थाका निवर्तमान अध्यक्षले संस्थाका महत्वपूर्ण कागजातसमेत जफत गरी १ करोड २२ लाख वन रकम संस्थालाई नबुझाएको उल्लेख छ। विज्ञप्तिमा ‘निजलाई ताकेता गरी हिसाब बुझाउन आग्रह गर्दा, आफू समस्यामा रहेको भन्दै आलटाल गरिरहेको र सम्पर्कमा नआएको’ भनिएको छ। 

एनसिसीको विज्ञप्ति

त्यतिबेला पनि शाहले संस्थाले भने जति रकम आफूले हिनामिना नगरेको भन्दै बचाउ गरेका थिए। आफू ३५ लाख वन मात्र तिर्न तयार भएका शाहले एनसिसीले विज्ञप्ति प्रकाशित गरेको एक वर्ष बितिसक्दा पनि संस्थालाई रकम नबुझाएको अध्यक्ष केसीले बताइन्। 

यी दुवै विषयमा प्रतिक्रिया लिँदा शाहले अदालतमा विचाराधीन मुद्दामा आफू नबोल्ने बताए। नेपाली सम्पर्क समितिको आर्थिक हिनामिनाको विषयमा भने आफूले संस्थालाई सबै रकम बुझाइसकेको उनको दाबी छ। 

‘मैले एनसिसी कोरियालाई तिर्नुपर्ने सम्पूर्ण रकम तिरिसकेकाले संस्थासँग कुनै पनि हिसाबकिताब बाँकी छैन, सबै क्लियर भइसक्यो,' उनले भने, 'यस विषयमा संस्थासँग नै सोध्नुस्।’

नेपाल सम्पर्क समिति नेपाली समुदायले कोरियामा गठन गरेको पहिलो संस्था हो। नेपाली दूतावास कोरियामा नभएको समयमा नेतृत्वदायी भूमिका यही संस्थाले निर्वाह गरेको थियो। नेपालीहरुको पासपोर्ट जापान पठाई नवीकरण गर्न यसै संस्थामार्फत सहजीकरण हुने गरेको थियो।