यसरी ठड्याइयो इन्द्रजात्राको लिंगो [फोटो फिचर]

निमेष जंग राई | २०७६ भदौ २४ मंगलबार | Tuesday, September 10, 2019 १४:५७:०० मा प्रकाशित

काठमाडौं- नेवार समुदायको विशेष पर्व इन्द्रजात्रा लिङ्गो ठड्याएर शुभारम्भ गरिएको छ। 

बिहान ९:१७ बजेको साइत पारेर गुर्जु पल्टनले भक्तपुरबाट ल्याएको ३२ फिट अग्लो लिंगो ठड्याएर इन्द्रजात्राको शुभारम्भ गरिएको हो।  

हनुमानढोका दरबार स्क्वायर क्षेत्रमा ठड्याएपछि विधिवत् रुपमा ८ दिने जात्रा सुरु भएको छ।  

यो अवधिमा लाखेनाचहरु देखाउने परम्परा छ। कुमारी, गणेश र भैरवको रथ जात्रासँगै आठौँ दिन लिंगो ढालेपछि जात्रा समाप्त भएको मानिन्छ। 

लिंगो ठड्याएपछि ८ दिनसम्म घरका बालकदेखि वृद्धसम्मले दिवंगत पितृको सम्झनामा शान्तिपाठ, स्तोत्रपाठ तथा पूजाआजा गर्ने प्रचलन छ। 

इन्द्रजात्राको मुख्य दिन यही भदौ २७ गते दिउँसो ४ बजे श्रीगणेश, श्रीभैरव र श्रीकुमारीको रथयात्रा शुरु हुन्छ।

राष्ट्रपति विद्यादेवी भण्डारीले गद्दी बैठकबाट श्रीगणेश, श्रीभैरव र श्रीकुमारीको दर्शन गरी दान दक्षिणापछि रथयात्रा शुरु गर्न अनुरोध गर्ने परम्परा छ। 

प्रत्येक वर्ष भाद्र शुक्ल चतुर्दशीका दिन पर्ने इन्द्रजात्रा धुलिखेल र दोलखालगायतका स्थानमा पनि मनाइन्छ।  

धार्मिक तथा सांस्कृतिक महत्व बोकेको इन्द्रजात्रामा वर्षा र सहकालका देवता देवराज इन्द्रको पूजा आराधना गरिन्छ।

जात्रा अवधिभर भक्कुनाच, महाकाली नाच, लाखेनाच, दशअवतार तथा देवराज इन्द्रको वाहन ऐरावत हात्तीको प्रतिकका रुपमा पुलुकिसी नाच नचाउने चलन छ।