एकतन्त्रीय शासनतर्फ लैजाने प्रधानमन्त्रीको चाहना : महामन्त्री कोइराला

नेपाल लाइभ | २०७६ भदौ २५ बुधबार | Wednesday, September 11, 2019 २१:३३:०० मा प्रकाशित

काडमाडौं- प्रमुख प्रतिपक्ष दल नेपाली काँग्रेसका महामन्त्री डा. शशांक कोइरालाले प्रधानमन्त्री केपी शर्मा ओलीको चर्को आलोचना गरेका छन्। 

कांग्रेस महामन्त्री कोइरालाले सम्पूर्ण अधिकार आफ्नो हातमा लिएर मुलुकलाई एकतन्त्रीय शासनतर्फ लैजाने खतरनाक प्रयास गरिरहेको भन्दै प्रधानमन्त्री ओलीको आलोचना गरेका हुन्। 

'मुलुकलाई एकतन्त्रीय शासनतर्फ लैजान प्रधानमन्त्री ओलीको सो भूमिका मुलुककै लागि खतरनाक छ,' नेपाल राष्ट्रिय पार्टी प्यालेस तथा क्याटरिङ महासंघको तेस्रो वार्षिक साधारणसभालाई बुधबार नवलपुरको गैंडाकोटमा उद्घाटन गर्दै महामन्त्री कोइरालाले भने। 

सरकारले संविधान परिवर्तन गर्न खोजेको उल्लेख गर्दै महामन्त्री कोइरालाले सरकारको प्रयासलाई सफल हुन नदिने चेतावनी पनि दिए।

महामन्त्री कोइरालाले संविधानमा केरमेट गर्ने सरकारको प्रयासलाई सफल हुन नदिन आफ्नो पार्टी सचेत रहेको पनि बताए। उनले नेपाली जनताको ७० वर्षदेखिको चाहना पूरा गर्न संघीय लोकतान्त्रिक गणतन्त्र स्थापना गरिएको भएपनि सरकारले जनताको चाहना र भावना अनुसार काम गर्न नसकेको दाबी गरे।