पहिरोले अवरुद्ध बेनी-जोमसोम सडक ५ दिनपछि सञ्चालनमा

नेपाल लाइभ | २०७६ भदौ २६ बिहीबार | Thursday, September 12, 2019 ०७:५५:०० मा प्रकाशित

म्याग्दी- विगत पाँच दिनदेखि अवरुद्ध रहेको बेनी-जोमसोम सडक आज बिहानबाट सञ्चालनमा आएको छ।

म्याग्दीको अन्नपूर्ण गाउँपालिका–३ र मुस्ताङको थासाङ गाउँपालिका–४ को सिमाना घोप्टेभिरमा पहिरोले आइतबारदेखि अवरुद्ध बनेको बेनी–जोमसोम सडक आज बिहानबाट सञ्चालनमा आएको हो।

पहिरोले करीब १३ मिटर सडकको बेस (जग/आधार) भत्काएपछि म्याग्दीको उत्तरी क्षेत्र हुँदै हिमाली पर्यटकीय जिल्ला मुस्ताङ जोड्ने ७६ किलोमिटर दूरीको यो सडकमा सिधा यातायात सेवा अवरुद्ध भएको थियो।

बेनी–जोमसोम–कोरला सडक आयोजनाको निर्माण कम्पनीको डोजर परिचालन र नेपाली सेनाको सहयोगमा विस्फोटक पदार्थ प्रयोग गरेर पहाड फुटाएर मर्मत गरिएको आयोजनाका सुपरभाइजर इन्द्रसिंह शेरचनले बताए।

बुधबार राति सडक मर्मत गरिएपछि आज बिहानबाट सिधा यातायात सेवा सुचारु भएको हो। बेनीदेखि मुस्ताङ जाने सवारीसाधन काभ्रे र मुस्ताङबाट बेनीतर्फ आउने सवारीसाधन घाँसामा रोकिएका थिए। बाटो सुचारु भएसँगै स्थानीयवासी, मुस्ताङ भ्रमण गर्ने पर्यटक र मुक्तिनाथ तीर्थयात्राका लागि जाने आउने तीर्थयात्रीलाई गन्तव्यतर्फ जान सहज भएको छ। मुस्ताङमा उत्पादित स्याउ बजारमा पुग्न थालेको छ।

यसअघि गत असार अन्तिम सातासमेत सोही ठाउँमा कालीगण्डकीले कटान गरेर बगाएको सडक एक हप्तापछि मर्मत गरेर यातायात सञ्चालन गरिएको थियो। स्तरोन्नतिको क्रममा रहेको बेनी–जोमसोम सडकको गलेश्वरदेखि घाँसासम्मको सडक पहिरोको जोखिममा रहेको छ।