पर्यटनमन्त्रीको निर्देशन- विमानस्थलमा ट्याक्सी सेवा सहज बनाउन तत्काल काम अघि बढाउनू

नेपाल लाइभ | २०७६ भदौ २७ शुक्रबार | Friday, September 13, 2019 १६:१८:०० मा प्रकाशित

फाइल तस्बिर


काठमाडौं- संस्कृति, पर्यटन तथा नागरिक उड्डयनमन्त्री योगेशकुमार भट्टराईले त्रिभुवन अन्तर्राष्ट्रिय विमानस्थलमा सञ्चालन भइरहेका ट्याक्सीहरुको हालको गुणस्तरको मूल्यांकन गरी यात्रुहरुलाई सहजता दिन आवश्यक अध्ययन गर्न विमानस्थलस्थित सवारी पार्किङ अनुगमन कमिटीलाई निर्देशन दिएका छन्। 

नेपाल नागरिक उड्डयन प्राधिकरण, विमानस्थल प्रशासनलगायतका सम्बद्ध पदाधिकारीसँगको छलफलमा मन्त्री भट्टराईले त्यस्ता ट्याक्सीहरुको गुणस्तर, मापदण्ड, भाडादर आदि विषयमा १ महिना भित्र प्रतिवेदन पेश गर्न निर्देशन दिएका हुन्। 

मन्त्री भट्टराईले विमानस्थल स्थित ड्यूटी फ्रि पसल पूनः संचालनका निम्ति बिक्री गरिने सामानहरुको सूचीसहित विमानस्थल व्यवस्थापनवाट यथाशिघ्र पेश गर्ने र मन्त्रालयस्तरवाट सम्वन्धित निकायमा समन्वय गरी ड्यूटी फ्रि पसल संचालन को लागी पहल गर्ने पनि बताएका छन्। 

यस्तै मन्त्री भट्टराईले विमानस्थल भन्सार क्षेत्रमा मेटल फ्रिको नाममा अनावश्यक सास्ती व्यहोर्नु परेको भन्दै त्यसलाई तत्काल र्‍यान्डम बेसिसमा चेकजाँच अघि बढाउन पनि निर्देशन दिएका छन्। 

यसैगरी विमानस्थलको सरसफाई, साजसज्जा, फूल बगैंचाहरुको अवस्था चुस्त दुरुस्त राख्ने, यात्रुहरुको सेवा सुविधा प्रवाहलाई समयानुकुल परिमार्जन गरी गुणस्तर बढाउने काममा विशेष पहल गर्न पनि भट्टराईले निर्देशन दिएका छन्। काममा अवरोध गर्ने कुनै पनि कम्पनीमाथि तत्काल कारबाही अघि बढाउन पनि मन्त्री भट्टराईले निर्देशन दिएका हुन्।