रुपन्देहीमा गोली हानी एक जनाको हत्या

दीपक घिमिरे | २०७६ भदौ २९ आइतबार | Sunday, September 15, 2019 १५:२१:०० मा प्रकाशित

भैरहवा- रूपन्देहीको रोहिणी गाउँपालिका-३ वैकुण्ठपुरमा गोली प्रहार गरी एक जनाको हत्या गरिएको छ।  

ओमसतिया गाउँपालिका-५ का २५ वर्षीय महेन्द्र चौधरीको गोली प्रहार गरी हत्या गरिएको हो। आइतबार दिउँसो साढे २ तिर चौधरीको हत्या भएको स्थानीयले बताएका छन्। 

गोली कसले र किन प्रहार गर्‍यो भन्ने खुल्न नसकेको रुपन्देही प्रहरीले जानकारी दिएको छ। 

खेती किसानी गर्दै आएका चौधरी भैरहवास्थित बैंकबाट पैसा निकालेर घर जाने क्रममा रहेका थिए।

मोटरसाइकलमा पिछा गर्दै आएका २ जनाको अज्ञात समूहले उनीमाथि गोली प्रहार गरी फरार भएको प्रहरीले बताएको छ। 

श्रीमती र एक बच्चासहित मोटरसाइकलमा जाँदै गरेका चौधरीको मोटरसाइकल रोकी उनीमाथि गोली प्रहार गरिएको थियो।

उनलाई ३ गोली लागेको छ। उनको घटनास्थलमा नै मृत्यु भएको हो। 

हत्याराले उनले बैंकबाट निकालेर ल्याएको ५ लाख समेत उनीहरूले लुटेर लगेको बताइएको छ।

अहिले मृतकको शव बाटोमा नै रहेको छ भने सो स्थानको बाटो बन्द हुनका साथै मानिसहरूको भीड छ। 

घटनाको अनुसन्धान भइरहेको प्रहरीले बताएको छ।