पेरिसको प्रहरी मुख्यालयमा छुरा प्रहारबाट ४ जनाको मृत्यु, आक्रमणकारी पनि मारिए

नेपाल लाइभ | २०७६ असोज १७ शुक्रबार | Friday, October 04, 2019 ०७:१७:०० मा प्रकाशित

पेरिस- फ्रान्सको राजधानी पेरिसको मध्यक्षेत्रमा रहेको प्रहरी मुख्यालयमा बिहीबार एक व्यक्तिले छुरा प्रहार गर्दा कम्तीमा ४ जनाको मृत्यु भएको छ। मृत्यु हुने सबैजना प्रहरी अधिकारी रहेका एक उच्च प्रहरी स्रोतले जनाएको छ।

प्राप्त जानकारीअनुसार आक्रमणकारीलाई नियन्त्रणमा लिने प्रयासमा प्रहरीले चलाएको गोली लागि उनको घटनास्थलमा नै मृत्यु भएको छ।

आक्रमणपछि पेरिसको केन्द्रमा रहेको इल द ला सिटे नामक क्षेत्रमा सुरक्षा व्यवस्था कडा बनाइएको छ। स्थानीय समयअनुसार दिउँसो करिब १ बजे प्रहरी भवनको चोकमा हमला भएको थियो।

यस्तै घटनालाई पेरिसका नगरप्रमुखले ट्विटरमार्फत पुष्टि गरेका छन्। फ्रान्सका प्रधानमन्त्री तथा आन्तरिक मामिलासम्बन्धी मन्त्री पनि घटनास्थलमा पुगेका प्रहरीले बताएको छ।

पछिल्ला वर्षहरूमा फ्रान्समा कार्यस्थलमा सिर्जना हुने घातक आक्रमणका घटना बढेका अनुसन्धानकर्ताहरूले बताएका छन्। बिहीबारको आक्रमणमा प्रहरी मुख्यालयमा प्रशासनिक एकाइमा काम गर्ने एक कर्मचारीले चक्कू प्रहार गरेका प्रारम्भिक सूचनामा स्थानीय प्रशासनले जनाएको छ।

यसबारे अनुसन्धान भइरहेकोले थप विवरण पछि आउने प्रशासनले बताएको छ। रासस/एएफपी