प्रहरीका इन्सपेक्टर नै चोरीमा संलग्न

अजय शाह | २०७६ असोज १७ शुक्रबार | Friday, October 04, 2019 १८:२६:०० मा प्रकाशित

जनकपुर- धनुषामा एक प्रहरी निरीक्षक (इन्सपेक्टर) नै चोरीका घटनामा संलग्न भएको देखिएको छ। चोरीको घटनामा प्रनि नै संलग्न देखिएपछि उनलाई कारबाही प्रक्रिया अघि बढाइएको छ। 

धनुषाको मिथिला नगरपालिकास्थित ढल्केबर इलाका प्रहरी कार्यालयका प्रहरी निरीक्षक अवधकिशोर ओझा एक्साभेटरको पार्टपूर्जा चोरी चोरीको घटनामा मुछिएका हुन्। उनलाई विभागीय कारबाही गर्ने प्रहरीले तयारी समेत गरेको छ। 

घटना विवरणअनुसार जंगलको जग्गामा पोखरी खनेर क्षति पुर्‍याएको भन्दै वन कार्यालयका कर्मचारीले मिथिला नगरपालिकाको पोखरिया भन्ने स्थानबाट एक्साभेटर नियन्त्रणमा लिएर गत फागुनमा प्रहरीलाई बुझाएको थियो। केही दिनपछि एक्साभेटर धनी जनुलाल महतो ईलाका प्रहरी कार्यालय ढल्केबर पुग्दा एक्साभेटरको पार्टपूर्जा निकालिएको पाएका थिए। 

महतोले बालुवा वासिङ उद्योगीसँग मिलेर प्रहरीले ६ लाख मूल्य बराबरको पार्टपूर्जा बिक्री गरेको दाबी गर्दै प्रदेश प्रहरी कार्यालयमा उजुरी दिएका थिए। महतोले उजुरी दिए लगत्तै प्रदेश प्रहरी कार्यालयले प्रहरी निरीक्षक ओझालाई ढल्केबरबाट प्रदेश प्रहरी गणमा तानेर छानबिन अगाडि बढाएको थियो।

घटनाको छानबिन गर्न प्रहरी उपरीक्षक उमाशंकर पञ्जियारको संयोकत्वमा गठित तीन सदस्यीय छानबिन समितिले घटनाको अनुसन्धान गरेको थियो। छानबिन समितिले आफ्नो प्रतिवेदन प्रदेश प्रहरी प्रमुख डीआइजी प्रद्युम्न कार्कीलाई बुझाइसकेको बताइएको छ। 

प्रहरी उपरीक्षक पंजियारको संयोजकत्वमा गठित ३ सदस्यीय छानबिन समितिले पाटपुर्जा चोरीको घटनामा प्रहरी निरीक्षक ओझा दोषी देखिएको ठहर गरी उनलाई विभागीय कारबाही गर्ने निष्कर्षमा पुगेको बताइएको छ। 

छानबिन समितिले बिहीबार प्रदेश २ का प्रहरी प्रमुख प्रद्युम्न कुमार कार्कीलाई प्रदिवेदन बुझाएको थियो। घटनामा प्रहरी निरीक्षक ओझा दोषी देखिएको समितीले निष्कर्ष निकालेको प्रहरी स्रोतले जनाएको छ।

प्रहरी निरीक्षक ओझाविरुद्ध उजुरी दर्ता भएपछि उनलाई जनकपुर तानेर अनुसन्धान प्रक्रियाअघि बढाइएको थियो। 

जिल्ला प्रहरी कार्यालय धनुषाले उनको ठाउँमा प्रहरी निरीक्षक रामकुमार यादवलाई खटाएको छ। प्रदेश प्रहरी कार्यालयले ‘पुलिसिङ द पुलिस फस्र्ट’ नीतिमा जोड दिँदै प्रहरी संगठनभित्र शुद्धीकरण अभियानलाई तीव्रता दिएको बताइएको छ।

छानबिन समितिको प्रतिवेदन आउन बाँकी रहेपनि डीआइजी कार्कीले एक्साभेटरको पार्टपूर्जा चोरीसम्बन्धी घटनामा प्रहरी निरीक्षक ओझाको संलग्नता देखिएको संकेत गरेका छन्। ‘प्रहरी चौकीबाटै एक्साभेटरको पार्टपूर्जा चोरी हुनु भनेको गम्भीर घटना हो,’ उनले भने, ‘कहीँ न कहीँ घटनामा संलग्नता देखिएपछि मात्र ओझालाई ईलाका प्रहरी कार्यालयबाट प्रदेश प्रहरी गणमा तानिएको छ।’

प्रतिवेदनमा उनी दोषी देखिए हदैसम्मको कारबाही हुने डीआइजी कार्कीले बताए। घटनाको सुक्ष्म तरिकाले अनुसन्धान भएको भन्दै उनले दोषी देखिएका कारबाही गर्न कुनै कन्जुस्याँइ नहुने स्पष्ट पारेका छन्।