बढी भाडा लिने सवारी साधन जाँचमा कडाइ, यात्रुलाई रकम फिर्ता गराइयो

नेपाल लाइभ | २०७६ असोज २४ शुक्रबार | Friday, October 11, 2019 ०९:१३:०० मा प्रकाशित

राजविराज- दसैं मनाएर राजधानी काठमाडौंतर्फ फर्किने यात्रुसँग यातायात व्यवसायीले मनलाग्दी भाडा असुल गर्न थालेपछि सप्तरीका सडकमा जाँचमा कडाइ गरिएको छ।

इलाका प्रहरी कार्यालय कडरबोना र अस्थायी ट्राफिक प्रहरी पोष्ट कदमाहाको संयुक्त टोलीले पूर्वका विभिन्न स्थानबाट आउने सवारी साधनलाई पूर्व-पश्चिम राजमार्गअन्तर्गत सुरुङ्गा नगरपालिका-६, कडरबोनामा रोकेर यात्रुसँग भाडा के कति लिइएको हो सोधपुछ गर्न थालेको छ।

इलाका प्रहरी कार्यालय कडरबोनाका प्रमुख प्रहरी निरीक्षक रामराजा केशरीका अनुसार जाँचका क्रममा करीब २० जना यात्रुबाट बढी भाडा लिइएको ७ हजार रुपैयाँ रकम फिर्ता गराइएको छ। क्षमताभन्दा बढी यात्रु बोक्ने सवारी साधनलाई कानुनबमोजिम जरिवानासमेत गरी चालक तथा सहचालकलाई सम्झाइबुझाइ गरी गन्तव्यतर्फ पठाइएको इलाका प्रहरी कार्यालय कडरबोनाले जनाएको छ। 

गन्तव्यमा पुग्नैपर्ने यात्रुलाई बाध्य पारेर बढी भाडा लिने गरिएको भन्दै प्रहरी निरीक्षक केशरीले त्यस्ता सवारीलाई रकम फिर्ता गराई कारबाही चालिएको र सवारी गतिसमेत चेकजाँच गर्न थालिएको बताए।

राजमार्गमा सवारी दुर्घटना बढेकाले विभिन्न चारपाङ्ग्रे सवारी साधन र मोटरसाइकलका चालक समेतलाई रोकी ट्राफिक नियम र दुर्घटना न्यूनीकरण गर्न जनसचेतनामूलक कार्य गरिएको जिल्ला ट्राफिक प्रहरी प्रहरी कार्यालयले जनाएको छ। रासस/फाइल तस्बिर