'टोनार्डो'को क्षति न्यूनीकरणका लागि पूर्व सूचना प्रणाली स्थापना गर्नुपर्ने सुझाव

नेपाल लाइभ | २०७६ कार्तिक ७ बिहीबार | Thursday, October 24, 2019 ११:१९:०० मा प्रकाशित

चैत्र १७ मा गएको टोर्नार्डोका कारण क्षतिग्रस्त बारा।


काठमाडौं- जल तथा मौसम विज्ञान विभागले बारा-पर्सामा आएजस्तो टोनार्डोबाट हुने क्षति न्यूनीकरणका लागि पूर्व सूचना प्रणालीको तत्काल स्थापना गनुपर्ने सुझाव दिएको छ।

बारा-पर्सामा गत चैत्र १७ गते आएको विनाशकारी टोनार्डोको अध्ययन प्रतिवेदनले त्यस्ता खाले विपत्तिबाट हुने क्षति न्यूनीकरणका लागि तत्काल पूर्व सूचना प्रणाली स्थापना गर्नुपर्ने सुझाव दिएको हो।

बुधबार उर्जा, जलस्रोत तथा सिँचाइमन्त्री वर्षमान पुनले सार्वजनिक गरेको सो प्रतिवेदनमा त्यस्ता खालको पूर्व सूचना प्रणालीले हावाहुरी, चट्याङसहितको विपत्तिबाट हुने क्षतिको न्यूनीकरण गर्न पनि सघाउ पुर्‍याउने जल तथा मौसमविद् डा अर्चना श्रेष्ठले जानकारी दिइन्।

बारा-पर्सामा आएको जस्तो मौसमी घटनाहरुबाट जनधनको क्षति न्यूनीकरण गर्न प्रदेश र स्थानीय तहमा पनि सावधानी अपनाउने गरी पूर्व तयारी पद्धतिको विकास गर्नुपर्ने सुझाव पनि सो प्रतिवेदनमा दिइएको छ।

विभागका महानिर्देशक सरजुकुमार वैद्यको अध्यक्षतामा गठन गरिएको समितिले सो टोनार्डोको स्थलगत अध्ययन गरी प्रतिवेदन तयार पारेको हो। प्रतिवेदनमा सो टोनार्डोको अधिकतम गति प्रतिघण्टा १ सय ८० देखि २ सय ६५ मिटर भएको अनुमान गरिएको पनि उल्लेख गरिएको छ।