इटहरी- बलात्कारको आरोपमा सिद्धबाबा भनिने कृष्णदास गिरिलाई सुनसरी प्रहरीले नियन्त्रणमा लिएको छ। सुनसरीको चतरास्थित आफ्नो आश्रमबाट उनलाई प्रहरीले नियन्त्रणमा लिएको हो।
बलात्कार आरोप लागेसँगै आश्रमबाट बाहिरिएका उनलाई शुक्रबार बिहान नियन्त्रणमा लिइएको सुनसरी प्रहरीले जनाएको छ।
गिरीलाई जिल्ला अदालत सुनसरीबाट पक्राउ पुर्जी जारी गरेर प्रहरीले समातेको हो। सुनसरी प्रहरी प्रमुख यज्ञविनोद पोखरेलका अनुसार गिरिलाई केही समयपछि सार्वजनिक गर्ने तयारी गरिएको छ।
गिरिमाथि कार्तिक ४ गते अनुयायी महिलालाई बलात्कार गरेको आरोप लागेको हो। महिलाले आफूलाई भेट्न बोलाएर चतरास्थित आश्रममै बलात्कार गरेको आरोप लगाएकी हुन्। शुत्रबार बिहानैदेखि आश्रम छोडेर उपचार गर्न भन्दै विराटनगर हिँडेका उनी प्रहरी हिरासतमा पुगेका हुन्।
बलात्कारसम्बन्धी जाहेरी जिल्लाले लिन नमानेपछि पीडित पक्ष केन्द्रीय अनुसन्धान ब्यूरो (सिआइबी)मा पुगेको थियो।
जाहेरीपछि सिआइबीको टोली जिल्ला प्रहरी कार्यालय सुनसरी आएको थियो। सिआइबीले पीडित महिलाको स्वास्थ्य परीक्षण गरेर जाहेरी सुनसरी पठाएको हो।
प्रहरी प्रमुख एसपी पोखरेलले घटनाको थप अनुसन्धान भइरहेको बताए।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।