प्रधानमन्त्रीको बलमा गोकर्ण फरेस्ट रिसोर्टको लिज अवधि नसकिँदै २५ वर्ष थपियो

नेपाल लाइभ | २०७६ मङ्सिर २८ शनिबार | Saturday, December 14, 2019 १०:४५:०० मा प्रकाशित

काठमाडौं- प्रधानमन्त्री केपी शर्मा ओलीको अडानले गोकर्ण फरेस्ट रिसोर्ट सञ्चालनको अवधि ६ वर्षअघि नै बढाइएको छ। सोमबार बसेको मन्त्रिपरिषद् बैठकले २५ वर्षका लागि यति होल्डिङस् प्रालिलाई जग्गा लिजमा दिने निर्णय गरेको हो।

सरकारले २०५२ साउनमा ३० वर्षका लागि गोर्कण फरेस्टलाई लिजमा दिने निर्णय भएको थियो। ३० वर्षे अवधि नसकिँदै प्रधानमन्त्री ओलीले मन्त्रिपरिषद्बाट निर्णय गराएका हुन्।

प्रधानमन्त्री निकट रहेका व्यवसायी आङछिरिङ शेर्पाको कम्पनी यती होल्डिङस् प्रालिलाई जग्गा लिजमा दिइएको हो। शेर्पाको पूर्व पर्यटनमन्त्री रवीन्द्र अधिकारीसँगै हेलीकोप्टर दुर्घटनामा गत फागुनमा मृत्यु भएको थियो।

नेपाल ट्रस्ट ऐनलाई एक वर्षअघि नै संशाेधन गरी गोकर्ण फरेस्टलाई जग्गा उपलब्ध गराइएको हो। २८ सय रोपनी रहेको जग्गा प्रतिरोपनी न्यून मासिक भाडामा लिजमा दिइएको छ। प्रतिरोपनी ५ सय ६४ रुपैयाँमा यतीलाई जग्गा उपलब्ध गराइएको छ।

झन्डै २४ वर्ष अगाडि राजपरिवारको स्वामित्व र भोगचलनमा रहेको सो जग्गा राजपरिवारले एल.एम.सुबिर ब्रदर्स (नेपाल) प्रालिलाई ३० वर्षको अवधिसम्म रिसोर्ट सञ्चालन गर्न लिजमा उपलब्ध गराएको थियो। उक्त समयमा जग्गाको प्रत्यक्ष रेखदेख दरबारमार्फत् नै हुथ्यो।

सरकारले लिज अवधि नसकिँदै समय थप्न लागेको समाचार नेपाललाइभले कार्तिक २७ मा प्रकाशित गरेको थियो। 

सम्बन्धित समाचार

सम्झौता सकिनुअघि नै गोकर्ण फरेस्ट रिसोर्टको लिज अवधि बढाउने तयारी

नेपाल ट्रष्ट : स्वार्थ पूर्तिका लागि कसरी बदलियो कानुन, कसरी भत्काइयो संरचना?