आगामी तीन दिनको मौसम पूर्वानुमान: अझै वर्षा र हिमपातको सम्भावना

नेपाल लाइभ | २०७६ मङ्सिर २९ आइतबार | Sunday, December 15, 2019 ०९:१०:०० मा प्रकाशित

काठमाडौं- अझै केही दिन सामान्य वर्षा र हिमपात जारी रहने भएको छ। मौसम पूर्वानुमान महाशाखाको पछिल्लो विवरणअनुसार आइतबार पनि वर्षा र हिमपातको सम्भावना छ।

आइतबार दिउँसो देशका अधिकांश  भू-भागमा सामान्य बदली रहने छ भने पश्चिमी भू-भागका थोरै स्थानहरु तथा मध्य र पूर्वीपहाडी  भू-भागमा हल्का वर्षा हुने सम्भावना छ। हिमाली भू-भागमा भने हल्कादेखि मध्यम हिमपात हुने सम्भावना छ।

राति पहाडी भू-भागमा आंशिकदेखि सामान्य बदली रही बाँकी भू-भागमा आंशिक बदली रहनेछ। हिमाली भू-भागहरुमा हल्का हिमपात हुने सम्भावना छ।

महाशाखाका अनुसार सोमबार दिउँसो पहाडी भू-भागमा आंशिक बदली रही अधिकांश भू-भागमा मौसम सामान्यतया सफा रहनेछ। त्यस्तै राति देशको  पहाडी भू-भागमा आंशिक बदली रही अधिकांश भू-भागमा मौसम सामान्यतया सफा रहनेछ।

मंगलबार दिउँसो भने देशको केही पहाडी भू-भागमा आंशिक बदली रही अधिकांश भू-भागमा मौसम सामान्यतया सफा रहनेछ। राति देशको केहि पहाडी भू-भागमा आंशिक बदली रही अधिकांश भू-भागमा मौसम सामान्यतया सफा रहनेछ।

मौसम पूर्वानुमान महाशाखाले तराईको हुस्सु/शितलहरबारे बिहान ७: ३५ मा भू–उपग्रहबाट लिएको तस्बिर

आगामी २४ घण्टामा केही उच्च पहाडीसहित हिमाली भू-भागमा हल्कादेखि मध्यम हिमपात हुने सम्भावना रहेकाले ती स्थानहरुमा सतर्कता अपनाउन महाशाखाले अनुरोध गरेको छ।

हुस्सु र शितलहर
अहिले पूर्वी तराईका केही भू-भागमा बाक्लो हुस्सु/कुहिरोको लागेको छ भने मध्य र पश्चिमी तराईका भू-भागमा सामान्य हुस्सु लागेको छ।

महाशाखाका अनुसार आगामी २४ घण्टासम्म शितलहरको सम्भावना छैन। तर, पश्चिम तराईमा  अहिले सामान्य हुस्सु लागेको छ र यो अपरान्ह सम्म हट्नेछ।

मध्य तराईमा सामान्य हुस्सु लागेको छ र अपरान्ह सम्म हट्नेछ। त्यस्तै पूर्व तराईमा अहिले  बाक्लो हुस्सु/कुहिरो लागेको छ र दिउँसो सम्म यो हट्नेछ।