कालिकोट- जिल्लाको पलाता गाउँपालिका १ खाँडागाउँमा आइतबार मध्यरातदेखि भीषण आगलागी हुँदा पूरै गाउँ विस्थापित भएको छ। आगलागीमा परी प्रारम्भिक विवरण अनुसार १६ जना घाइते भएका छन्।
कालिकोटका प्रमुख जिल्ला अधिकारी चन्द्रबहादुर कार्कीका अनुसार खाडागाउँको न्यौपाने बस्तीका ८७ घर जलेर नष्ट भएका छन्। खाँडागाउँका सबै घर खरको छानाले बनाइएका थिए। खाँडामा पानीको पनि निकै समस्या रहेको छ। जसका कारण पनि आगो नियन्त्रणमा समस्या आएको थियो।
इलाका प्रहरी कार्यालय थिर्पु र पचाल झरना गाउँपालिकाबाट उद्धारका लागि प्रहरी घटनास्थलमा पुगेको जिल्ला प्रहरी कार्यालयका निमित्त डिएसपी देवेन्द्र मल्लले बताए। मध्यराति २ बजेतिर खबर पाएपछि प्रहरीको टोली खटाएको उनले बताए।
प्रहरीलाई घटना स्थलतर्फ पुग्न करिब ५ घन्टाको समय लाग्ने भएकाले अबेर पुगेको र विवरण पाउन समस्या भएको उनले बताएका छन्। जिल्ला सदरमुकाम मान्मबाट करिब ३२ कोषको दुरीमा खाँडागाउँ रहेको छ।
सदरमुकामबाट उद्धारका लागि सशस्त्र प्रहरीसमेत घटनास्थलतर्फ हिँडेको छ। खरको छाना भएको र सुक्खा ठाउँ भएकाले पनि आगो नियन्त्रमा आउन नसकेको प्रमुख जिल्ला अधिकारी कार्कीले बताए।
यसरी भयो आगलागी
गाउँको पुछारमा रहेको नवीन न्यौपानेको घरबाट आगो सुरु भएको थियो। हावाहुरी धेरै चलेकाले घनाबस्तीमा आगो फैलियो। नजिकै पानीको अभाव भएकाले तत्काल आगो नियन्त्रणमा समस्या आयो।
गाउँका युवा कामको खोजीमा बाहिर हुँदा आगो नियन्त्रणमा जनशक्ति अभाव भएकाले बस्ती नै सखाप भएको छ। आगलागी हुँदा बालबच्चा, महिला र वृद्धवृद्धा मात्र घरमा थिए।
अन्नबाली, लत्ताकपडा समेत नष्ट भएका कारण आगलागी पीडितलाई खान बस्न समस्या हुने देखिएकाले जिल्लामा आपतकालीन बैठक बसिरहेको प्रजिअ कार्कीले बताए। जिल्लामा रहेको आपतकालीन उद्धार कोषलाई सक्रिय बनाएर जनतालाई राहत दिन स्थानीय निकायसँग पनि सम्वन्वय गर्ने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
