काठमाडौं– त्रिभुवन अन्तर्राष्ट्रिय विमानस्थलको ५२ रोपनी जग्गामा रजाइँ गर्दै आएका व्यवसायी दीपक मल्होत्राले निर्माण सम्पन्न नै नभएको भवनमा विभिन्न १० फर्म भाडामा राखी अवैध रुपमा भाडा असुली गर्दै आएको खुलासा भएको छ।
मल्होत्राले निर्माण सम्पन्न नै नभएका भवनका कोठाहरू भाडामा लगाउँदै अवैधानिक रूपमा भाडा असुली गरेका हुन्।
‘त्रिभुवन अन्तर्राष्ट्रिय विमानस्थलको प्रवेशद्वार (गोल्डेन गेट) नजिकै निर्माणाधीन भवन भाडामा लगाउँदै अवैध रूपमा रकम असुली गरिरहेका छन्,' विमानस्थल कार्यालयका एक कर्मचारीले भने, ‘भाडा असुलीको विवरण हामीसम्म आइपुगेको छैन।’
विमानस्थल कार्यालयलाई मल्होत्राले विवरण उपलब्ध नगराउनुको कारण हो, उठेको रकम शतप्रतिशत आफ्नै खल्तीमा राख्न पाउनु। ‘यसलाई ब्रम्हलुट भनेर पनि तपाईं बुझ्न सक्नुहुन्छ,’ ती कर्मचारीले भने, ‘विवरण पठाए त केही हिस्सा भएपनि विमानस्थल कार्यालयलाई पठाउनुपर्ने हुन्छ। यही प्रावधान मिचेर मल्होत्राले खल्ती भरेका छन्।’
मल्होत्राले निर्माण गरेको भवनमा सेवा सञ्चालनका लागि त्रिभुवन अन्तर्राष्ट्रिय विमानस्थल कार्यालयले सञ्चालन अनुमति दिनुपर्छ। तर, मल्होत्राले विमानस्थल कार्यालयको सहमति बिना केही संस्थालाई निर्माणधीन भवनका कोठा भाडामा लगाउँदै रकम असुल्दै आइरहेका छन्। मल्होत्राले गरेको यो सबै काम २०६९ कात्तिक २ गते विमानस्थल कार्यालयसँग भएको सम्झौताविपरीत छ।
विमानस्थल कार्यालय र रसुवा जेभी ज्वाइन्ट भेन्चर प्रालिबीच भएको सम्झौतामा नेपाल नागरिक उड्डयन प्राधिकरणको स्वामित्वमा रहेको ५२ रोपनी जग्गामा सवारी पार्किङ, बाहिर निस्कने मार्ग, आगन्तुक प्रतीक्षालय, चमेना गृह, पर्यटक मनोरञ्जनका लागि पार्क, बगैंचालगायत विमानस्थल व्यवसायसँग सम्बन्धित कामका लागि भवनलगायतका आवश्यक पूर्वाधार निर्माण २१ महिनाभित्र सम्पन्न गर्ने उल्लेख छ।
यसरी निर्माण भएको संरचनामा सेवा सञ्चालनका लागि विमानस्थल कार्यालयले स्वीकृत इन्जिनियरिङ प्रारुप बमोजिमका सम्पूर्ण संरचनाहरुको निर्माण कार्य भएपनि सञ्चालन स्वीकृति अनुमति प्रदान गरेपछि मात्र व्यवासियक प्रयोजनमा ल्याइने उल्लेख छ।
सम्झौतापत्रको ५औं बुँदामा उल्लेख गरिएका प्रावधानविपरीत मल्होत्राले विमानस्थल कार्यालयलाई सेवा सञ्चालनका लागि अन्य संस्थासँग गरेको सम्झौतापत्र नबुझाई एकलौटी रूपमा रकम असुली गरिरहेका छन्।
सम्झौतापत्रको ६ नम्बर बुँदामा उल्लेख भएको शुल्क सम्बन्धी व्यवस्था लत्याउँदै मल्होत्राले अवैधानिक सेवा सञ्चालन गरी अवैध रुपमा रकम असुली गरिरहेका छन। तर, सम्झौता पत्रमा उल्लेख भएअनुसार विमानस्थल कार्यालयलाई कुनै पनि रकम बुझाएका छैनन्।
मल्होत्राले निर्माणको काम सम्पन्न नभएपनि दैनिक १ हजार भन्दा बढी सवारी पार्किङ वापतको रकम र भवनका कोठा भाडामा लगाउँदै रकम असुली गरिरहेका छन्।
अवैधानिक भवनमा अहिले मल्होत्रालाई मासिक भाडा बुझाउँदै १० व्यवसायिक फर्म बसिसकेका छन्। झन्डै एक वर्षअघिदेखि यी फर्म सो निर्माणाधीन संरचनामा गएर सेवा प्रदान गर्ने संस्था भने प्रभु बैंक हो। प्रभु बैंकका सिइओ अशोक शेरचनले आफूहरूले मल्होत्राको कम्पनीसँग सम्झौता गरेर सेवा सुरु गरेको बताएका छन्।
तर, शेरचनले आफूले मासिक रुपमा तिर्दै आएको रकम भने खुलाउन चाहेनन्। सिइओ शेरचनसँग मासिक भाडाका विषममा सम्झौता गरेका मल्होत्राले विमानस्थल कार्यालयलाई प्रभु बैंकसँग भएको सम्झौतपत्र नबुझाएको विमानस्थल कार्यालय एक कर्मचारीले बताए।
विमानस्थल कार्यालयले २०६९ सालमा गरेको सम्झौतापत्रमा दोस्रो पक्ष (निर्माण पक्ष अर्थात् मल्होत्रा)ले तेस्रो पक्षलाई निर्माण भएको संरचनामा सेवा सञ्चालन गर्न दिँदा गरेको सम्झौतापत्र बुझाउनु पर्ने उल्लेख छ। तर, मल्होत्राले सेवा सञ्चालन गर्न दिएका संस्थासँग गरेको कुनै पनि सम्झौतापत्र विमानस्थल कार्यालयमा बुझाएका छैनन्।
मल्होत्राले अहिले अवैधानिक संरचनामा द बेकरी क्याफे, बेक्स एन्ड केक्स, काठमाडौं एयरपोर्ट ट्राभल एन्ड टुर्स, टी-थ्री थकाली, कैलाश हेलिकोप्टर, संगम मिठाई, हिमालयन जाभा कफी, पंक द बेकरी र सलल क्याफेबाट मासिक भाडा संकलन गरी रहेका छन्।
मल्होत्राले विमानस्थल कार्यालयसँग गरेको सम्झौताअनुसार यी संस्थासँग संकलन गरेको केही रकम विमानस्थललाई बुझाउनु पर्ने भएपनि सो अनुसार उनले काम भने गरेका छैनन्।
सम्झौतापत्रको ६ (ग)मा उल्लेख भएअुनसार तेस्रो पक्षसँग व्यवसाय सञ्चालनका लागि लिएको भाडाको पहिलो १० वर्ष ५ प्रतिशत, दोस्रो १० वर्ष १५ प्रतिशत र बाँकी अवधिमा २५ प्रतिशतका दरले मल्होत्राले विमानस्थललाई भाडा बुझाउनु पर्ने हुन्छ।
यी रकम छलीका लागि मल्होत्राले विमानस्थल कार्यालयलाई सम्झौतापत्र नबुझाएका हुन्। यसका साथै ५२ रोपनी जग्गा बापतको ६ करोड रुपैयाँभन्दा बढी रकम पनि मल्होत्राले विमानस्थल कार्यालयलाई बुझाएका छैनन्।
सबै तस्बिरः निमेषजंग राई र मनोज न्यौपाने
यो पनि पढ्नुहोस्ः
त्रिभुवन अन्तर्राष्ट्रिय विमानस्थलको ५२ रोपनी जग्गामा दीपक मल्होत्राको रजाइँ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786800305.jpg)
-1786602170.png)
-1786513116.png)
