बुटवल- सञ्चार तथा सूचना प्रविधिमन्त्री गोकुल बास्कोटा प्युठानको गौमुखी गाउँपालिकामा आयोजित मिडिया सम्मेलन उद्घाटन गरेर सोमबार साँझ भैरहवास्थित गौतमबुद्ध अन्तर्राष्ट्रिय विमानस्थल पुग्दै थिए।
प्युठानबाट भैरहवा आउने क्रममा बाटोबाट पटकपटक आफू काठमाडौं जाने जहाज बुद्ध एयरसँग सम्पर्कमा थिए उनी। तर, सञ्चारमन्त्री बास्कोटा काठमाडौँ फर्किन पाएनन्।
बुद्ध एयरको जहाज डिले भएपछि काठमाडौं जान नपाएका मन्त्री बास्कोटा रुपन्देहीमै बस्नुपर्यो। बुद्ध एयरले ‘धोका दिएपछि’ आफू काठमाडौं जान नपाएर रुपन्देहीमै बास बस्नुपरेको उनको भनाइ छ।
सोमबार काठमाडौं जानबाट रोकिएका मन्त्री बास्कोटाले मंगलबार बिहान प्रेस चौतारीले मणिग्राममा आयोजना गरेको पत्रकार सम्मेलनमा काठमाडौं फर्किन नपाउनुको कारणबारे सुरुमै चर्चा गरे।
‘यो बुद्ध एयर भन्नेले गर्नु गर्यो, सुरुमा प्लेन निकै ढिला गर्यो। ढिला भएपछि हामीले क्यान्सिल गरेर एयरपोर्टको बाटो हुँदै होटल पुग्यौं। पछि जहाज आएपछि जान्छौं भन्दा हामीलाई जानकारी नै नदिई जहाज काठमाडौं उड्यो भन्यो’, उनले ठट्यौली शैलीमा भने, ‘नयाँ वर्षमा लुम्बिनी जस्तो पर्यटकीय स्थलमा यस्तो हालत छ, उडाउँछु भनेर यात्रुलाई अलपत्र पार्ने!’ यस्ता एयरलाइन्सले जनतालाई कति सास्ती दिएका होलान्। कसरी पर्यटन प्रवर्द्धन हुन्छ, तपाईंहरु लेखाजोखा गर्नुस् त।'
यता बुद्ध एयर भैरहवाका प्रमुख दर्शन घिमिरेले ६ बजेको उडान खराब मौसमका कारण राति ८ बजे मात्र उडेको बताएका छन्। मन्त्री रोकिनुको कारणबारे घिमिरेले भने, ‘पहिला जहाज क्यान्सिल हुन्छ भन्ने लागेर उहाँहरु एयरपोर्ट नै नआई होटलतर्फ लाग्नुभयो। पछि प्लेन आएपछि खबर गर्दा आउन समय लाग्ने भएर प्लेन उड्दा उहाँहरु छुट्नुभयो।’
'सुरुमा सेक्युरिटीसँग बुझ्दा उहाँहरु नजाने भन्ने खबर आएको थियो, पछि प्लेन आएपछि जान्छौं भन्ने कुरा आयो,' प्रमुख घिमिरेले भने, 'मौसम खराबीका कारण जहाज होल्ड गर्ने अवस्था थिएन। बाध्य भएर उहाँलाई छाडेर जानुपर्यो।'
मन्त्री बास्कोटाले काठमाडौं जान नपाएको कारण खुलाएपछि उनले मिडियाप्रति पनि केही कुरा राखे। ‘प्रेसमा रेडिमेड शंका छ, हामीले कस्तो मनोविज्ञान निर्माण गर्न खोजेको?’ उनले मिडियालाई रेडिमेड शंका त्यागेर विषयवस्तुमा केन्द्रित आलोचना गर्न आग्रह गरे।
‘नेपालको प्रेस साँच्चिकै व्यवसायिक, साँच्चिकै सबल, समुन्नत र आधुनिक भएको हेर्न चाहन्छौं, सरकार त्यसमा कटिबद्ध भएर लागेको छ, यसमा कुनै फरक मत छैन, मिडियाले पनि आफ्नो धर्म नबिर्सोस्,' उनले सुझाए।
उनले सरकारले गरेका कामको सकारात्मक ढंगले समाचार नआएको भन्दै गुनासो पनि पोखे। ‘मिडियाले सडक बन्दै गरेको नदेख्ने, धुलो उडाएको, सडकमा हिँड्नै नभएको मात्रै देख्ने? सरकारले खत्तमै पार्यो भनेर बेपत्तै प्रचार गर्ने? जन्मिरहेको बालक नदेख्ने, आमाको प्रसव पीडा, रोदन, रगताम्य भएको अवस्था, चित्कार मात्रै देख्ने?' उनले भने, 'चुनौती र सम्भावना पनि सँगसँगै छ भन्ने कुरा हामीले देखाइदिनुपर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
