काठमाडौं- त्रिभुवन अन्तर्राष्ट्रिय विमानस्थलको रनवे पिच परिर्वतनको काम यतिबेला धमाधम भइरहेको छ। सन् १९९० पछि पहिलो पटक विमानस्थलको ३ हजार मिटरको रवने, ट्याक्सी वे र एप्रोनको पिच परिवर्तनको काम सुरु भएको हो।
चैत १८ गतेबाट पहिलो चरणको काम भइरहेको हो। पहिलो चरणमा चिनियाँ ठेकेदार कम्पनीले रनवेको मध्य विन्दु अर्थात् जहाजले टेक अफ गर्ने र ल्यान्ड गर्ने केन्द्रविन्दुको दायाँ/बायाँ १०/१० मिटरका दरले २० मिटरको पिच परिवर्तन गर्नेछ।
रनवे पिच परिर्वतनका लागि हाल दैनिक १० घन्टा सबै उडान तथा अवतरण बन्द गरिएको छ। बेलुका १० बजेबाट बिहान ८ बजेसम्म काम गर्ने समय छुट्याएर उक्त समय उडान अवतरण बन्द गर्नुपरेको नेपाल नागरिक उड्डयन प्राधिकरणका महानिर्देशक सञ्जीव गौतमले जानकारी दिए।
सन् १९७५ को दशकमा निर्माण भएको रनवेको पिच पहिलो पटक परिवर्तन हुन लागेको हो। रन–वे पिच परिर्वतन ( (रिह्याबिलिटेसन) को जिम्मा चिनियाँ सरकारी कम्पनी चाइना नेसनल एग्रो टेक्नोलोजी इन्टरनेसनल इन्जिनियरिङ कर्पाेरेसनले पाएको छ। चिनियाँ निर्माण कम्पनीसँग करबाहेक ३ अर्ब ७५ करोड रुपैयाँ रनवे पिच परिर्वतनका लागि सम्झौता भएको गौतमले जानकारी दिए। रनवे पिच परिर्वतनमा करसहित ४ अर्ब २७ करोड रुपैयाँ खर्च हुने उनको भनाइ छ।
.JPG)
अहिले निर्माण कम्पनीले दैनिक ३ सयभन्दा बढी कामदारमार्फत काम गरिरहेको छ। सुरुवाती चरणमा दैनिक ५० मिटरका दरले काम भइरहे पनि मौसमले भने पूर्ण रुपमा सहयोग नगरेको उनको भनाइ छ।
.JPG)
कम्पनीले प्रतिदिन मिलिङ मेसिनको साथमा राति रनवे खन्दै बिहानसम्म तयार गर्ने गरी काम गरिरहेको छ।
भिडियो-
विमानस्थलको कोटेश्वरतर्फको ०२ रनवेको १६ सय मिटरमा बढी समस्या देखिएको छ। रनवेको पिच परिवर्तनसँगै ट्याक्सी वेको पिच पनि परिवर्तन हुन्छ। 'कतिपय ठाउँको ४१ सेन्टिमिटरसम्म माटो निकालेर नयाँ पिच हाल्नुपर्ने अवस्था छ’, गौतमले भने।
ट्याक्सी वेको कतिपय स्थानमा ५३ सेन्टिमिटरसम्मको संरचना परिवर्तन गर्नुपर्ने अवस्था रहेको उनले जानकारी दिए।
गिट्टीमा समस्या
रनवेको पिच परिवर्तन भएसँगै फेरि गिट्टीमा समस्या देखिएको छ। अहिले निर्माण कम्पनीले पहिलो चरणका लागि आवश्यक गिट्टी लगभग जम्मा पारे पनि अन्य भागका लागि भने गिट्टी संकलनमा समस्या देखिएको गौतमले जानकारी दिए।
निर्माण कम्पनीले काभ्रेको रोशी खोलाबाट गिट्टी ल्याइरहेको थियो। तर, स्थानीयको अवरोधका कारण अहिले त्यहाँबाट गिट्टी ल्याउन बन्द भएको छ। त्यसपछि पुनः ललितपुरको देवीचौरबाट गिट्टी ल्याउन सुरु भएको पहिले दिनमै स्थानीयले बिजुलीको तार काटेर समस्या उत्पन्न गरेको गौतमको भनाइ छ। तर, गिट्टीको समस्या नआउन माथिल्लो निकायबाट स्थानीय जनप्रतिनिधि तथा राजनीतिक दलका नेतासँग पनि छलफल गरिरहेको उनको भनाइ छ।
.JPG)
शब्द : उत्तम काप्री
फोटो/भिडियो : निमेष जंग राई
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
