काठमाडौं– नीति तथा कार्यक्रम पास गर्ने कार्यसूचीमा रहेको प्रतिनिधिसभा स्वभाविक गतिमा अघि बढिरहेको थियो।
सांसदहरुको प्रश्नको जवाफ दिन प्रधानमन्त्री केपी शर्मा ओली मञ्चमा पुगे।
मञ्चमा पुगेपछि प्रधानमन्त्री ओलीले भने, ‘प्रश्न र जिज्ञासाका लागि धन्यवाद। आक्रोश, कुन्ठा र निम्छरा अभिव्यक्तिका वास्ता नगरेर प्रश्नहरुको उत्तर दिन्छु।
आफ्ना प्रश्नहरुलाई कुन्ठा, आक्रोश र निम्छरा अभिव्यक्तिको संज्ञा दिएपछि प्रतिपक्षी दलका सांसदहरु आक्रोशित भए। उनीहरुले आपत्ति जनाए।
ओलीले घुरेर हेरे।
सांसद मीनबहादुर विश्वकर्माले माइक लिएरै प्रधानमन्त्री ओलीको अभिव्यक्ति विरोध गर्दै संसदीय मर्यादा उलंघन भएको बताए। कांग्रेसका अरु सांसदहरुले पनि सभामुखको ध्यानाकर्षण गराए।
सबै उठेर नाराबाजी गर्न थाले। सभामुखले आफ्नो ध्यानाकर्षण भएको अवगत गराउँदै जवाफ सुन्न आग्रह गरे।
फेरि प्रधानमन्त्री ओलीले रुखो बोली प्रयोग गरे, ‘प्रश्नको सीमा र मर्यादा हुन्छ।’
विरोध भइरह्यो।
सभामुखले सांसदलाई भने, ‘ध्यानाकर्षण भनेको बुझ्नुहोस्।’
सांसद मीनेन्द्र रिजालले कड्किए, ‘प्रधानमन्त्री सम्माननीय हुनुहुन्छ। हामी सम्मान गर्छौं। यो शब्द संसदीय अभिलेखबाट हटाइनुपर्छ।’
सांसदहरुले रुलिङ गर्न आग्रह गरे। संसदको गरिमा कायम राख्न जरुरी भएको बताए। आग्रह गरे, ‘सभामुख महोदय रेकर्ड खोलेर सुनियोस्। कुन प्रकारका शब्द प्रयोग गरिएका छन्।’
ओलीले फेरि धम्क्याए, ‘तपाईंहरुलाई आफ्ना प्रश्नका जवाफ चाहिएको छ कि छैन?’ उनले फेरि भने, ‘प्रश्नको जवाफ चाहिएको छ कि छैन?’
'मर्यादित ढंगको व्यवहार गर्न सिक्नुहोस्,' उनले सिकाए, अपशब्द बोल्ने अधिकार होइन, प्रश्न सोध्ने अधिकार हो।
सभामुले रेकर्डबाट हटाउने/नहाटाउने निर्णय पछि गर्ने बताए।
हुटिङका बीच फेरि प्रधानमन्त्रीले बोल्न सुरु गरे।
आफूलाई अमर्यादित ढंगले अपशब्द बोलेको प्रधानमन्त्री ओलीले बताए।
प्रतिपक्षी दलका सांसदबाट आवाज आयो, ‘अपशब्द बोलेको भए सभामुखलाई भन्ने हो।’
प्रधानमन्त्री ओलीले तुरुन्तै जवाफ फर्काए, ‘मैले सभामुखलाई होइन, तपाईंलाई जफाव दिने हो?’
त्यसपछि हुटिङकै बीच प्रधानमन्त्री ओलीले बोल्न थाले र भने, ‘संविधान मैले पनि पढेको छु। माननीयजीले पनि पालना गर्नुपर्छ।’
उनले लटरपटर जवाफ दिए र प्रश्नोत्तर कार्यक्रम टुंग्याए। सभामुखले पेलेरै नीति तथा कार्यक्रममाथि हालिएको संशोधनको निर्णय गराए।
संशोधनकर्ता लक्ष्मणलाल कर्ण र चन्दा चौधरीले संसदीय मर्यादा कायम नभएको भन्दै फिर्ता लिने वा निर्णयार्थ प्रस्तुत गर्ने निर्णयमा नपुगेको उल्लेख गरे। तर, सभामुखले पेलेरै पास गराए।
प्रधानमन्त्रीको जवाफमा सांसदहरु प्रेम सुवाल, दिव्यमणि राजभण्डारी, पुष्पा भुसाल गौतम, सुजाता परियार, गगन कुमार थापा, दिलेन्द्र प्रसाद बडू, पार्वता डिसी चौधरी, डिला संग्रौला पन्त, हिरा गुरुङ, राजेन्द्र कुमार केसी, संञ्जय गौतम, देवेन्द्रराज कँडेल, शरद सिंह भण्डारी, अनिल कुमार झा, उमा रेग्मी, डाक्टर मिनेन्द्र रिजाल, लक्ष्मी परियार, ज्ञानेन्द्र बहादुर कार्की, प्रमिला राई, मिन बहादुर विश्वकर्मा, मिना पाण्डे, तेजुलाल चौधरी, अमरेश कुमार सिंह, प्रकाश रसाईली स्नेही, राम बहादुर विष्ट, दुर्गा पौडेल, महेन्द्र राय यादवले प्रतिप्रश्न गरेका थिए।
भिडियो
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770478002.png)
-1764146706.png)
