नेपाल एयरलाइन्सको ग्राउन्डेड बोइङ-७५७।
काठमाडौं- राष्ट्रिय ध्वजाबाहक नेपाल वायुसेवा निगमका ८ वटा विमान अहिले ग्राउन्डेड छन्। ग्राउन्डेड भएका ८ विमानमध्ये पनि अन्तर्राष्ट्रिय उडानमा प्रयोग हुँदै आएको बोइङ-७५७ ग्राउन्डेड भएको झन्डै ५ महिना पुग्नै लागेको छ।
बोइङ ग्राउन्डेड हुनअघि सोही विमानमार्फत नेपाल वायुसेवा निगमले सातामा मलेसियामा ३ र दिल्लीमा ३ वटा उडान गर्दै आएको थियो।
२८ अक्टोबर, २०१८ मा निगमले मर्मतका लागि बोइङलाई मलेसिया पठाएको थियो। विमान मर्मतपछि १६ जनवरी, २०१९ मा विमान मलेसियबाट काठमाडौं आउँदै थियो। तर, आकाशमै उडिरहेको बेला 'विङ स्क्रिन’ बिग्रन गयो। समस्या आए पनि विमान काठमाडौं विमानस्थलमा अवतरण गरिएको थियो।
त्यसपछि केही दिन विमान ग्राउन्डेड भयो। ग्राउन्डेड भएको विमान प्राविधिक टोलीले मर्मत गरेर उडान योग्य बनाए। तर, उडानका लागि योग्य हुँदा पनि बोइङ उडान गरिरहेका पाइलटहरुको सिप परीक्षण प्रमाणपत्र (पिपिसी) को म्याद सकिएका कारण उडान हुन सकेको छैन।
तर, निगम व्यवस्थापनले अझैसम्म पाइलटहरुको पिपिसी नवीकरण गर्न चीन पठाउने तयारी गरेको छैन। पाइलटहरुले पनि विमान नै नउडाई बेसिक ४५ घन्टा बराबरको मासिक २ लाखभन्दा बढी तलब लिइरहेका छन्।
निगमका कार्यकारी अध्यक्ष मदन खरेलले सो विमानको उडान गराउने वा नगराउने भन्ने अन्योलका कारण ग्राउन्डेड भएको बताउँदै आएका छन्। उनले बोइङ विमान नउडाउने घोषण समेत गरेको बताउन थालेका छन्। विमान उडान गर्ने वा नगर्ने भने विषयमा अध्ययन गर्न गठित समितिले प्रतिवेदन तयार पारिसकेको समेत उनको भनाइ छ।
वाइडबडी भित्रिएको वर्ष दिन हुँदा पनि थपिएन नयाँ गन्तव्य
नेपाल एयरलाइन्सले वाइडबडी विमान खरिद गरेर नेपाल ल्याएको ११ महिना पुग्न लागिसकेको छ। एयरलाइन्सले खरिद गरेको २ वटा वाइडबडी विमानमध्ये पहिलो वाइडबडी विमान 'अन्नपूर्ण' गत असार १४ गते काठमाडौं आइपुगेको थियो भने दोस्रो वाइडबडी 'मकालु' पनि पहिलो आएको एक महिनापछि नेपाल ल्याइएको थियो।
पहिलो अन्नपूर्णले व्यवसायी उडान सुरु गरेको १० महिना र मकालुले उडान सुरु गरेको ९ महिना पूरा भइसकेको छ। लामो दूरीमा सिधा उडान गर्ने भन्दै एयरलाइन्सले प्रतिविमान १० करोड ४८ लाख अमेरिकी डलर खर्च गरेर दुई थान विमान ल्याएको थियो।
तर, निगम कार्यकारी अध्यक्ष खरेल र व्यवस्थापनका कारण अहिले पनि वाइडबडी विमानले छोटै दूरीमा उडान गरिरहेको छ।
निगमको वाइडबडी विमानले अहिले दिल्ली, दुवई, कतार लगायतकै पुरानो गन्तव्यमा उडान गरिरहेको छ। निगमले वाइडबडी विमानमार्फत साउदी अरब, कोरिया, चीन तथा जापान उडान गर्ने बताए पनि सफल हुन सकेको छैन।
वाइडबडी विमान अहिले दैनिक ७ देखि ८ घन्टा मात्रै उडान हुँदै आएको छ। यो विमान फुल फेजमा उडान गर्ने हो भने दैनिक १३ घन्टासम्म उडन सक्छ।
निगमले वाइडबडी विमानले लामो दूरीमा उडान गर्ने बताउँदै आएको विषय अहिले पुरानोसमेत भइसकेको छ। त्यति मात्रै होइन विमान उडान गरेर आम्दानी गर्न नसकेको निगमले विमान खरिदमा लिएको ऋणको किस्ता र ब्याजसमेत तिर्न सकेको छैन। किस्ता र ब्याज तिर्नकै लागि अर्थ मन्त्रालयले रकम दिनु परेको छ।
निगमले वाइडबडी विमानमार्फत फेब्रुअरीदेखि जापानको ओसाका र मार्चदेखि चीनको गोन्जाव उडान गर्ने बताए पनि सफल भएको छैन।
चीन उडानमा प्रक्रिया नै पूरा गर्न नसकेको निगमले जापान उडानका लागि तय गरेको तालिकासमेत सारिसकेको छ। निगमले असार तेस्रो सातादेखि गर्ने भनेको जापान उडान पनि सारेर भदौमा पुर्याएको छ।
१६० दिनमा ३५ दिन मात्रै उड्यो वाई–१२
नेपाल एयरलाइन्सले आन्तरिक उडानमा प्रयोग गर्दै आएको ४ वटा वाई–१२ विमान पनि १ सय ६० दिनमा ३५ दिन मात्रै उडेको छ। एयरलाइन्ससँग रहेका ४ वटा वाई-१२ विमानमध्ये ३ वटा उडान गर्न मिल्ने छन्। तर, पाइलट अभाव तथा भएका पाइलटको व्यवस्थापन हुन नसक्दा वाई–१२ विमान सन् २०१९ को जनवरीयता उड्नै सकेका छैनन्।
३ वटा वाई–१२ विमान भने निगमका कार्यकारी अध्यक्ष खरेलकै मनपरीका कारण ग्राउन्डेड भएका छन्। खरेलले वाई–१२ विमान उडान गरिरहेका पाइलट उद्धव घिमिरेलाई ए–३२० विमान उडानका लागि प्रशिक्षणमा पठाउने निर्णय गरेसँगै चारै वटा चिनियाँ विमान वाई–१२ ग्राउन्डेडको शृंखला सुरु भएको हो।
वाई–१२ विमान उडान सञ्जय बादे, नृपेन्द्र भट्टराई, उद्धव घिमिरे र आङनुरी शेर्पाले गर्दै आएका थिए। तर, खरेलले गरेको सो निर्णयमा निगमका सिनियर पाइलट बादे र भट्टराई सन्तुष्ट हुन सकेनन्। उनीहरु असन्तुष्ट भएसँगै विमान ग्राउन्डेड हुने क्रम सुरु भएको हो।
चिनियाँ एमए-६० पनि एउटा मात्रै उडानमा
निगमसँग रहेका दुई वटा एमए-६० विमानमध्ये एउटा विमान ग्राउन्डेड भएर बसेको छ। एमए-६० ले अहिले दैनिक दुई गन्तव्यमा उडान गरिरहेको छ। एमए-६० ले समग्रमा भने विराटनगर, भद्रपुर, नेपालगन्ज र धनगढीमा उडान गर्दै आएको छ।
ग्राउन्डेड भएको एमए-६० विमान पनि तत्काल मर्मत हुने अवस्थामा छैन।
२ ट्विनअटर पनि ग्राउन्डेड
निगमसँग रहेका ३ वटा ट्विनअटर विमानमध्ये २ ग्राउन्डेड भएर बसेका छन्। ट्विनअटर उडानमा ४ जना पाइलट रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
