साउथह्याम्पटन- विश्वकप क्रिकेटमा गएराति भएको अफगानिस्तानविरुद्ध भारतको रोमाञ्चक जितमा मोहम्मद शामी नायक बने। अफगानिस्तानलाई अन्तिम ओभरमा जितका लागि १६ रन आवश्यक रहेको अवस्थामा शामीले लगातार ३ विकेट लिँदै भारतलाई रोमाञ्चक जितको स्वाद चखाए।
उनले अन्तिम ओभरको तेस्रो, चौथो र पाँचौं बलमा अफगानिस्तानका ३ ब्याट्सम्यानलाई पेवेलियनको बाटो देखाएका थिए। शामीले तेस्रो बलमा मोहम्मद नाबीलाई हार्दिक पान्ड्याको हातबाट क्याच आउट गराए। उनले अफगानिस्तानका लागि सर्वाधिक ५२ रनको योगदान दिएका थिए।
त्यसपछि ब्याटिङ गर्न आएका आफताब आलम र मुजिब उर रहमानलाई शामीले एकै खालको बलको सिकार बनाएका थिए। उनीहरु दुवैजना बोल्ड भएका थिए। दुवै ब्याट्सम्यान गोल्डन डक आउटको सिकार भएपछि अफगानिस्तान प्रतियोगिताको आफ्नो छैठौं खेलमा पनि पराजित भएको हो।
उनले ९.५ ओभरमा ४० रन खर्चिएर ४ विकेट लिँदै आफ्नो स्पेल सकाएका थिए।
विश्वकपमा ह्याट्रिक गर्ने दशौं खेलाडी
विश्वकपमा १०औं ह्याट्रिक गर्ने बलरको रुपमा शामीको नाम दर्ता भएको छ। यसअघि ९ जना बलरहरुले यो सफलता हासिल गरेका छन्। उनी विश्वकपमा ह्याट्रिक गर्ने भारतका दोस्रो बलर बनेका छन्। विश्वकपमा कुनै पनि भारतीय बलरले ह्याट्रिक विकेट लिएको यो ३२ वर्षमा पहिलो पटक हो। यसअघि सन् १९८७ मा भारतकै चेतन शर्माले इतिहासमा पहिलोपटक विश्वकपमा पहिलो ह्याट्रिक गरेका थिए।
सन् १९९९ मा पाकिस्तानका सकलेन मुस्ताक, २००३ मा श्रीलंकाका चामिन्दा भास, सोही वर्ष अष्ट्रेलियाका ब्रेट लीले ह्याट्रिक विकेट लिएका छन्।
सन् २००७ को विश्वकपमा श्रीलंकाका लासिथ मलिंगाले लगातार ४ बलमा ४ विकेट आफ्नो नाममा गरेका थिए। विश्वकपमा यो सफलता हासिल गर्ने उनी एक मात्र बलर हुन्। उनले सन् २०११ को विश्वकपमा समेत ३ ब्याट्सम्यानलाई लगातार पेवेलियनको बाटो देखाएका थिए।
भारत, बंगलादेश र श्रीलंकाले संयुक्त रुपमा आयोजना गरेको यो विश्वकपमा वेस्टविन्डिजका केमर रोचले समेत ह्याट्रिक गरेका थिए।
सन् २०१५ भएको विश्वकपमा समेत २ वटा ह्याट्रिक बनेका थिए। इंग्ल्यान्डका स्टेभिन फिन र दक्षिण अफ्रिकाका जेपी डुमिनी लगातार ३ विकेट लिन सफल भएका थिए।
विश्पकपको यो संस्करणमा शामी पहिलो ह्याट्रिक गर्ने खेलाडी हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
